4/27/2019 8:00 am 入棺禮拜 - 屏東市 生命園區
4/27/2019 9:00 am 火化 - 屏東市立火葬場
4/20/2019 12:00 親情相惜
4/27/2019 2:00 pm 告別禮拜 - 屏東市 迦南台灣基督長老教會
4/27/2019 4:00 pm 安厝禮拜 - 屏東 高樹 日光園
阮的老父(とうちゃん)佇大正13年(1924)7月19日，出世佇台南六甲。六甲公學校畢業以後，考入屏東農業學校畜產科，第二名畢業。昭和18年(1943)佇新營任職畜產技手，一冬後轉虎尾畜產係服務。仝一年，和王秀琴女士結婚，做夥生活超過一甲子。
二次世界大戰時in搬去屏東市。1948年とうちゃん開始佇屏東縣政府服務，擔任技士。後來接受家畜人工授精訓練，1961年得著農林廳保送，去日本研習家畜人工授精技術。倒來以後，佇逐鄉社推廣豬仔品種改良。1965年通過考試院檢核，得到獸醫師證照。佇屏東縣政府服務42年，1989年退休。
1964及1969攏總三年外，伊受農復會借調，去越南協助畜牧改良。1984閣受經濟部農業司借調，去薩爾瓦多擔任畜牧改良兩冬。兩遍佇外國服務，攏得著當地政府頒發感謝狀。
とうちゃん退休以後，有卡濟的時間和囝孫做夥，做義工，去外國旅遊。伊和阮媽媽bat去澳洲、美洲、東南亞和歐洲幾若國，閣有幾若擺去日本。伊也bat擔任國家森林遊樂區義務解說員。
とうちゃん真會體諒別人，幫贊別人。伊對老父極其有孝；屏農畢業以後，伊的老父都和阮蹛做夥。阿伯的查某囝、大姑的大囝讀冊的時bat和阮蹛作夥，因為學校離阮兜卡近。阮兜也bat收留一個對中國來台灣的囡仔，因為伊的阿姐袂當照顧伊。
とうちゃん對囝兒的教育非常重視。大查某囝翠娥學習護理，畢業以後佇基督教病院做護士。大囝明哲研究所畢業以後，佇中華電信服務，也bat佇大學教冊。第二囝明智軍官學校畢業以後，佇軍中服務。第三囝明聰大學畢業以後，服務佇林務局。
とうちゃん無嫌甘苦。除了佇縣政府以外，逐年立秋去田庄替農民閹牛。逐遍他倒來的時，也是阮享受麻油、薑炒牛lān核的時。阮兜空地bat飼過豬、羊、牛，也bat裝孵卵機，替人孵雞卵。
とうちゃん極其重視運動，也鼓勵阮著運動。退休以後，伊逐日一定騎腳踏車一點鐘，騎到附近的鄉村。他的筋骨極其勇，頭毛烏烏烏。2012年(當時88歲)有一遍騎車去運動公園，為著踢一隻大聲吠的狗，摔斷大腿骨。2013年有艱苦，醫生給伊洗腎三遍才脫離危險；以後逐禮拜固定洗腎三擺。
とうちゃん有伊的原則。伊本來有食薰的習慣，以後就改掉。做一個台灣人，伊關心台灣，伊看報紙、電視的報導，閣申請台灣人的身分證，用行動表明家己的心。
伊有研究的精神。伊參考藥典，研究成藥，家己處方。伊列出健康食品，家己用，也戶阮的媽媽用。伊也學習用電腦來寫中、日文批信，看網路報導，使用網路影音，閣固定從網路看囝孫的種種生活紀錄。
阮兜對外媽開始信基督教，とうちゃん佇2010年(當時86歲)也決志洗禮加入教會。伊參加松年團契活動，也幫贊日文歌詞的解說。
阮真幸福thang及とうちゃん做夥生活即呢長的時間，伊的做人、辦事，攏是囝孫上好的模範。伊的辛苦，在囝兒的心頭，永遠ti
teh。以上分享とうちゃん一生的畧歷，閣一遍感謝上帝的憐憫及引導。
